إهداء إلى أمي الغالية بمناسبة يوم الأم
في عيني أرسمك !!
في عيني أرسمك لوحة و أشوف الرسم ذا يفني
و آقوم أشيل لك عيني ، و أحطك وسطها يمه
و أصير آشوف من حبك / أمل في حلم حطمني !
حطامي ! كله فلحظة / إذا جيتي قوى عظمه
يا يمه كل شي يحكي / عن أنسامك لا ضمتني !
يا يمه كل شي فيني : إذا جيتي فقد همّه
إذا غبتي يغيب الحب ، و تظلم دنيتي فعيني !
ياعالم / اسمعوا مني : كلامي و احسنوا فهمه !
متى ما الدم يسري بي : غلاها يظل آسرني !
لأنها نعمةٍ تغمر / فجاج الكون بالنعمة ..
تداري ضحكتي لا تمل ، و تكره ما يكدرني !
و إذا دق الحزن بابي تسد الحزن و تذمه
تشجع جيش أحلامي .. لجل أرقى و اظل أبني
في آمالي بحرية ، و تحيي فيني الهمَة
و مرة مر كابوس (ن) و ضيّع كم حلم منّي !
وضاعت فيني آلامي يا كيف اليأس بآلمّه ؟
و لا شي خفف أوجاعي ما غير أمي رثت حزني !
و حالي حيل عذبّها ؟! و جات لصدري تضمه
ألا ليت السعد ! يا ناس / يدوم لقلب يعشقني
و أبي يمه العذر منك / إذا حلمي قصر عزمه !
جيوش أحلامي متأهبة : يا ويل الياس ذا مني!
بشبّ الثار في صدره ، و يرجع للعزم حلمه
و أغمض هايمة بحبك ، دروب العشق تاخذني ..
أجيك و راسمة صورة فؤادي زايد (ن) همّه
مدام الشعر يقصر بك ! و كلماتي تضايقني !
يا كيف أوصف مدى حبك ، يا مصعبها من امهمة ؟
أحبك .. لا أنا أعشق.. غرامك حيل ذوبني !
و لا إنسان بالدنيا يلوم إنسان حب أمه
31 مارس 2010
سبيكة محمد الشحي
